دین ئه‌فیونه و باشترین وه‌سیله‌ی ده‌ستی سه‌رمایه‌یه بۆ سه‌ركوتی زیاتر، بۆیه ده‌بێت ببێته ته‌نها ئه‌مرێكی شه‌خسیی ئینسانه‌كان و به‌ته‌واوی له ده‌سه‌ڵات دوور بخرێته‌وه..!
هیچ دینێك مالیكیه‌تی تایبه‌تی ره‌د ناكاته‌وه، بۆیه تا كۆمه‌ڵگای چینایه‌تی مابێت دین و خورافه به‌به‌هێزیی خۆیان ده‌مێێننه‌وه، چونكه مولكیه‌تی تایبه‌تی بریتیه له پایه‌ی ئه‌ساسیی سه‌رمایه.
ئه‌مه‌ی سه‌ره‌وه له دووتوێی باسێكدا هاتوه كه حه‌میدی ته‌قوایی له‌سه‌ر مه‌زهه‌ب زیاتر له ٢٠ ساڵ له‌مه‌وبه‌ر نوسیویه‌تی. ئه‌م وته‌یه هیچ پێویستی به سه‌لماندن نیه‌و مێژووی زیاتر له ٢٠٠٠ ساڵ ئه‌مه‌ی به به‌شه‌ریه‌ت نیشانداوه.
لێره‌دا من ده‌مه‌وێ ئه‌وه بڵێم كه مێژووی خه‌باتی خه‌ڵكی كرێكارو زه‌حمه‌تكێش له ده‌یه‌ها ساڵ و بگره له سه‌دان ساڵ له‌مه‌و به‌ره‌وه بۆئه‌وه بووه كه ژیانی باشتر وئاسوده تر بكات، وه ئه‌مه‌ش به‌بێ ده‌ست ڕا گه‌یشتن به هوشیاریی ته‌واو وه ئاگاهیی سیاسیی كامل وه به‌بێ درك كردن به ته‌واوی مه‌یدانه لاواز وبه‌هێزه‌كانی خه‌بات بۆ ڕزگاریی یه‌كجاری مه‌حاڵه و بۆ ئه‌م كاره‌شخه‌ڵكی چه‌وساوه له هه‌موو قۆنه‌غه‌كانی ژیاندا له هه‌وڵی به‌ده‌ست هێنانیدا بووه.. بۆیه ته‌نانه‌ت هه‌ر له سه‌رده‌می قه‌رمه‌تیه‌كان و حه‌للاجه‌وه‌بگره كه خه‌ڵكی چه‌وساوه‌ی ژێرده‌سه‌ڵاتی سیسته‌می خه‌لافه‌تی ئیسلامیی پڕ له ناعه‌داله‌تی گه‌ڕاون به دوای ڕێگا چاره‌ی ژیانداو ئاگاهانه ڕاپه‌ڕیون وه به‌گژی ئه‌و ده‌سه‌ڵاته‌دا چوونه‌ته‌وه.(هه‌رچه‌نده كه ده‌سه‌ڵاتێكی تری ئیسلامیی جارێكی تر سه‌ركوتی كردوونه‌ته‌وه). تاده‌گات به شۆڕشی بۆرژوازی و پیشه‌سازی له ئه‌وروپا و به تایبه‌ت فه‌ره‌نسا، كه خه‌ڵكی له‌خه‌باتیاندا بۆ به‌دیهێنانی ژیانێكی باشتر هه‌وڵیاندا كه دین له ده‌وڵه‌ت جیا بكه‌نه‌وه، چونكه زانیویانه كه ڕێگهرێكی گه‌وره‌یه له‌به‌رده‌م سكۆلاریزم گه‌شه‌ی كۆمه‌ڵگادا، له‌وهش‌دا تاڕاده‌یه‌كی باش سه‌ركه‌وتو بوون. پاشان دركی هوشیارانه و فه‌یله‌سوفانه‌ی ماركس بۆ ئه‌م سیسته‌مه و شیكردنه‌وه‌ی هه‌موو لایه‌نه‌كانی سه‌رخان و ژێرخانی ئه‌و كۆمه‌ڵگایه‌و دیاری كردنی ڕێگاچاره بۆ ڕزگاریی یه‌كجاره‌كیی، كه ئه‌ویش به‌دیهێنانی سۆسیالیزم و كۆمۆنیزم بوو كه به نوسینی سه‌رمایه و مانیفێستی حیزبی كۆمۆنیست خستیه به‌رده‌م چینی كرێكار. وه هه‌ر له‌و نێوه دا كارل ماركس ئه‌وه‌ی له‌بیر نه‌چوو كه له پێناو ئه‌م ئامانجه‌دا و بۆ سه‌ركه‌وتنی شۆڕشی كۆمه‌ڵایه‌تی ده‌بێت هوشیاری كۆمه‌ڵایه‌تی بگاته ئاستی پێویست له‌و نێوه‌دابوو كه بۆ ئه‌وه‌ی تیشك بخاته سه‌ر ئه‌و هۆكارانه‌ی كه كۆمه‌ڵگا به دواكه‌تویی ده‌هێڵێته‌وه ده‌ستی برد بۆ مه‌سه‌له‌ی دین و وتی كه دین له‌ناوبه‌ری گه‌لانه ، تا خه‌ڵكی ئاگاهانه درك به خه‌ته‌ری دین و خورافه بكه‌ن و بزانن، كه تا ته‌سلیمی ئه‌و دین و خورافه‌یه بووبن ئه‌وه مه‌حاڵه ڕزگار بونیی یه‌كجاره‌كی له چه‌وسانه‌وه.
شۆڕشی ئۆكتۆبه‌ر مێژوی نزیكی خه‌باتی خه‌ڵكی كرێكارو زه‌حمه‌تكێشه له پێناو ڕزگاریی یه‌كجاره‌كی و به‌دیهینانی كۆمۆنیزمدا، به‌داخه‌وه سه‌رنه‌كه‌وتنی ئه‌م شۆڕشه‌تا كۆتایی و به‌دینه‌هاتنی كۆمۆنیزم، جارێكی تر ڕێگه‌ی خۆشكرده‌وه بۆ هێنانه‌‌وه مه‌یدانی دین جه‌هل و خۆرافه بۆنێو كۆمه‌ڵگاو ئالووده بوونه‌وه‌ی به‌م تلیاك و مادده خه‌ته‌ره بێهۆشكه‌ره‌ی كه بۆرژوازی هه‌ر زوو به‌و په‌ڕی تواناوه گه‌شه‌ی پێدایه‌وه، چونكه ده‌یزانی كه باشترین وه‌سیله ی بێهۆشكردن و ده‌سته‌مۆ كردنی كۆمه‌ڵگایه‌و ڕازی كردنی خه‌ڵكیه به‌و نه‌هامه‌تیه‌ی كه خۆی ،واته بۆرژوازی، به‌سه‌ریدا هێناوه.
ێستا دین كه له‌سه‌ر تاسه‌ری دنیادا به‌هێزترین چه‌كه به‌ده‌ستی چینی ده‌سه‌ڵاتداره‌وه، بۆرژوازی توانیویه‌تی به‌و شێوه‌یه‌ی كه بازاڕه‌كانی بۆ گه‌رم ڕاده‌گرێت وه له ته‌واوی دنیادا بێگوێ دانه ئه‌وه‌ی كه ئاكامی ئه‌و ده‌سه‌ڵاته دینی و مه‌زهه‌بییه چی به‌سه‌ر ژیان و گوزه‌رانی منداڵان وژنان وته‌واوی به‌شه‌ریه‌ت دا ده‌هێنێت، گه‌شه‌ی پێبدات وه له فاتیكانه‌وه تا ده‌گات به ئه‌فغانستان به‌شێكی سه‌رسوڕهێنه‌ر له‌سه‌روه‌ت و سامان له كه‌نیسه‌و مزگه‌وت و مه‌لا و شێخ و قه‌شه و حاخامه‌كاندا سه‌رف بكات وه‌به‌ویست و ئاره‌زووی خۆی ب‌یانخاته گه‌ڕ وه له‌دژی خه‌ڵكی ناڕازی وه ئازادیخواز، ده‌زگاو حیزب و گروپ و ده‌سه‌ڵات و حكومه‌تیان بۆ دروست بكات و به‌وپه‌ڕی تواناوه ئاماده‌یه تادروستكردنی دونیای چه‌ند ئیمپراتۆریه‌تی دینی ش له‌سه‌ر ئه‌و به‌رنامه ڕه‌ش و تاریكه به‌رده‌وام بێت گه‌ر له به‌رانبه‌ریدا هێزێك نه‌بێت كه‌ڕایبگرێت.....
ئه‌م به پیرۆز كردنی دین و خورافه‌یه‌ی بۆرژوازی و چینی سه‌رمایه ته‌نهاو ته‌نها له پێناو كه‌ڵه‌كه كردنی زیاتری قازانجدایه و بۆ ته‌نها یه‌ك چركه‌و به‌قه‌د گه‌ردیله‌یه‌كیش په‌یوه‌ندی به ڕێز گرتن له باوه‌ڕی شه‌خسیی ئینسانه‌كانه‌وه نیه و به‌ڵكو به پێچه‌وانه‌وه سود وه‌رگرتنه له باوه‌ڕی دواكه‌وتوانه‌ی هه‌زاران ساڵه و به‌رهه‌مهێنانه‌وه‌ی ئه‌و دواكه‌وتووییه‌یه له پێناو گێڕانه‌وه‌ی سه‌رده‌مه تاریكه‌كان و درێژه‌دان به ته‌مه‌نی ده‌سه‌ڵاتدارێتیان. ئه‌وه‌ی كه زۆر ڕوون و ئاشكرایه ئه‌وه‌یه كه ده‌یان ساڵه به بڕی خه‌یاڵی و له ژماردن نه‌هاتوو خراوه‌ته خزمه‌ت ته‌واوی گروپ و حیزب و ته‌یاره دینیه‌كان هه‌ر له توندڕه‌وه‌كانی ئیسرائیله‌وه تا ده‌گات به تالیبان، حیزبولڵای ئێران و لوبنان، ئیخوان موسلیمینی میسر و ئوردن، ئیسلامیه‌كانی توركیا، سعودیه، سۆدان، سۆماڵ، ویه‌مه‌ن، تاده‌گاته‌وه به ئیسلامیه‌كانی عێراق به‌گروپه‌كانی لایه‌نگری ئه‌مریكاو ته‌نانه‌ت ئه‌وانه‌ش كه له ئۆپۆزیسیۆن دان، تا یه‌كگرتووی ئیسلامیش له كوردستان، هه‌ر هه‌موویان به‌وپه‌ڕی تواناوه كۆمه‌ك و پشتیوانی گه‌وره یان پێگه‌یشتووه بۆئه‌وه‌ی ببن به‌و هێزه كه بتوانن دڕندانه له‌دژی مه‌ده‌نیه‌تی كۆمه‌ڵگاو پێشكه‌وتنخوازی، ئازادی و سۆسیالیزم شه‌ڕ بكه‌ن و دێوه‌زمه‌ی ڕه‌ش و تاریك به‌سه‌ر ناوچه‌و شوێنه‌كانی ژێر ده‌سه‌ڵاتیاندا بسه‌پێنن. به‌ڵام ئه‌مه‌ش هیچ ڕێگه‌ی له‌وه نه‌گرتووه كه بۆرژوازی و سه‌رمایه‌داریی جیهانیی نه‌توانن له‌و وڵاتانه‌دا، كه ئه‌م حیزب و گروپه ئیرهابی و مه‌زهه‌بییانه حاكمن، نه‌توانن سه‌رمایه‌گوزاری بكه‌ن وپه‌یوه‌ندیه‌كانیان بپچڕێت. نه‌خێر به پێچه‌وانه‌وه، گه‌ر ده‌ورانی شه‌ڕی نێوان هه‌ردوو باڵی سه‌رمایه بهێنینه‌وه بیری خۆمان ده‌بینین كه چۆن بازاڕی ئازادی سه‌رمایه‌ی اه‌مریكی و ئه‌وروپای غه‌ربی له‌دژی سه‌رمایه‌داری ده‌وڵه‌تیی بلۆكی شه‌رقی ئه‌وسای سه‌ربه یه‌كێتی سۆڤیه‌ت وله ناوه‌رۆكدا له دژی ئازادی و ده‌ستكه‌وته‌كانی خه‌ڵك وه به‌تایبه‌ت له‌دژی سۆسیالیزم و كۆمۆنیزم چۆن ده‌ستیان كرد به كۆمۆكی زۆر و وه‌حشیانه و په‌ره‌دان به هه‌موو گرووپه كۆنه‌په‌رسته دینیه‌كانی ناوچه‌كه‌و به‌وپه‌ڕی تواناوه هه‌وڵیاندا كه چه‌نده‌ها شه‌ڕی دینی قه‌ومی دروست بكه‌ن و ده‌یان و سه‌دان هه‌زار له خه‌ڵكی بێتاوان بكه‌نه قوربانی مه‌رامه‌كانیان وه له چه‌ندین وڵاتدا ده‌سه‌ڵاتی دینی مه‌زهه‌بییان به‌زۆر به‌سه‌ر خۆڵكیدا داسه‌پاند كه ئه‌فگانستانی ژێر ده‌سه‌ڵاتی تاڵیبان زیندووترین نمومه‌یان بوو. وه هه‌ر بۆرژوازی جیهانی وه به‌تایبه‌ت ئوروپای غه‌ربی بوو كه له‌ساڵی ١٩٧٩ دا به‌وپه‌ڕی تواناوه پشتیوانییان له خومه‌ینی و ده‌سه‌ڵاته ئیسلامیه‌كه‌ی كرد به‌دژی شۆڕشی خه‌ڵكی ئێران و له‌و كاته‌وه تائێستاش هه‌ر ئه‌وانن كه نه‌ك هه‌ر ئه‌وه‌ی كه هیچ كێشه‌یه‌كیان نیه له‌گه‌ڵ ده‌سه‌ڵاتی ئیسلامیی له‌ئێراندا نیه به‌ڵكو ده‌یانه‌وێت كه ئه‌و ده‌سه‌ڵاته هه‌وڵ بدات باشتر به‌رژه‌وه‌ندیه ئابووریه‌كانیان بپارێزێت تا ئه‌وانیش باشتر ببنه پارێزگاری ده‌سه‌ڵات و ده‌زگا سه‌ركوتگه‌ریه‌كه‌ی.
ئه‌وه‌ی كه لێره‌دا شایانی ئیشاره‌ت پێكردنه ئه‌وه‌یه كه نه شێخه‌كانی سعودیه و پاسه‌وانانی بیره نه‌وتیه‌كانی وڵاتانی كه‌نداو، نه عه‌مامه به‌سه‌ره‌كانی ئێران و نه‌ئوسامه بن لادنیه‌كان هیچ كێشه‌یه‌كیان له‌گه‌ڵ ره‌قیبه‌كانیان له ئه‌مریكا وئه‌وروپای غه‌ربیدا له‌مه‌ڕ دنیای سه‌رمایه‌داری وچه‌وسانه‌وه‌ی وه‌حشیانه‌ی بۆرژوازی بۆ كرێكاران به‌كۆیله‌كردنی ملیارده‌ها ئینسانی سه‌رگۆی زه‌وی و سه‌ركوتی ژنان و به‌كۆیله كردنی ملیۆنه‌ها له منداڵانی ته‌مه‌ن ١٠ تا ١٥ ساڵ له بازاڕی كاردا نیه، ته‌نها كێشه‌یه‌ك كه هه‌یان بێت ئه‌وه‌یه كه كێشه له‌سه‌ر دووباره دابه‌شكردنه‌وه‌ی بازاڕی سه‌رمایه‌ی جهانییه و ڕازی نه‌بوونه به‌م شێوه دابه‌شكردنه‌ی ئێستا كه به‌پێی تێڕوانینی ئیسلامی سیاسی و به‌تایبه‌ت ئه‌وانه‌ی كه وه‌ك ئێران و سعودیه هه‌م خاوه‌نی گه‌وره‌ترین بیره نه‌وتیه‌كانی جیهانین وهه‌م خاوه‌نی سه‌رچاوه‌ی گه‌وره‌ترین پیشه‌سازی دینیشن، كه ده‌توانن له‌سه‌رتاسه‌ری دنیادا ئیسلام وه‌ك باشترین پیشه‌سازیی به‌رهه‌مهێن كه ساڵه‌ها ملیارده‌هایان له دۆلار بۆ به‌رهه‌م ده‌هێنێت وه زۆر به ئاسانی وزۆر به هه‌رزان ده‌توانن هێزی كاری ئه‌و پیشه‌سازیه به‌رهه‌مهێنه خه‌یاڵیه بخه‌نه گه‌ڕ له‌بازاڕه‌كانی دنیادا، ئه‌مریكا و ئه‌وروپای غه‌ربی به‌شی شێریان به‌ركه‌وتووه و ده‌بێت زۆرێك له‌و وڵاتانه‌ی كه ئه‌م ده‌سه‌ڵاته ئیسلامییانه پێیان وایه كه موڵكی ئیمپراتۆریه‌تی ئیسلامیه‌و ده‌بێت خۆیان ده‌سه‌ڵات بگرن به‌سه‌ریدا و خۆیان سه‌رمایه‌گوزاری تێدا بكه‌ن و په‌یوه‌ندیه‌كان له‌گه‌ڵ بازاڕی ئه‌مریكی ئه‌وروپیدا ده‌بێت ته‌نها ناڕاسته‌وخۆ وبێ ده‌ست تێوه‌ردان بێت وه ته‌واوی ده‌سه‌ڵات له‌ژێر ڕكێفی خۆیاندا بێت. ئه‌مه‌ش بۆ ئیسلامی سیاسی مانای مانه‌وه‌ی ده‌سه‌ڵاتی چینی بۆرژوازی كۆنه‌په‌رست و دواكه‌وتووی هه‌زاروپێنج سه‌د ساڵ له‌مه‌وبه‌ره، تابه‌و پێیه بتوانن ته‌مه‌نی نه‌گریسیان بگه‌یه‌ننه ته‌مه‌نی هه‌مان دڕنده هاوشێوه‌كانی پێشینانیان له بابه‌تی خه‌لافه‌ته‌كانی دوای محه‌مه‌د و ئه‌ماره‌ته‌كانی ئه‌مه‌وی، عه‌بباسی عوسمانیه‌كان.
هه‌ڵكشانی ده‌سه‌ڵاتی ئیسلامی سیاسی له دنیادا و به‌تایبه‌ت ده‌وری جیددی ئه‌م ده‌سه‌ڵاته له به شكستدا بردنی هه‌موو ئه‌و میساوه‌مانه‌ی كه باڵی ناسیۆنالیستیی عه‌ره‌بی له فه‌له‌ستین له‌گه‌ڵ ده‌سه‌ڵاتدارانی ئیسرائیلیدا به درێژایی ده‌یان ساڵ ده‌یكرد و پاشان ڕووداوه‌كانی ١١ی سه‌پته‌مبه‌ر، ده‌یان و سه‌دان جار له به‌رانبه‌ردا ته‌وژمی كۆنه‌په‌رستانه‌ی مه‌سیحیه‌ت و یه‌هودیه‌تی توند كرده‌وه‌و هه‌موو ئه‌و ده‌ستكه‌تانه‌ی كه‌زیاتر له‌سه‌د ساڵ بووخه‌ڵكی ئه‌وروپا به‌ده‌ستیان هێنابوو له نمونه‌ی جیایی دین له ده‌وڵه‌ت و مافه مه‌ده‌نیه‌كانی ژنان و منداڵان، دووباره كه‌وته‌وه ژێر هه‌ڕه‌شه‌و دین له سایه‌ی ئه‌م ده‌سه‌ڵاته سه‌رمایه‌داریه دڕنده‌یه‌دا دوباره ڕه‌ونه‌قی پێدرایه‌وه‌و ته‌واوی سه‌رمایه و ته‌واوی میدیا زه‌به‌لاحه‌كانی جیهانی خراوه‌ته‌وه خزمه‌ت و ته‌بلیغ بۆ له‌به‌ریه‌ك هه‌ڵوه‌شاندنه‌وه‌ی كۆمه‌ڵگا له‌سه‌ر ئه‌ساسی دین و مه‌زهه‌ب ده‌كه‌ن. ئه‌م سیسته‌مه هۆكاری ئه‌سڵیی قه‌سابخانه پڕ له وێنه تۆقێنه‌ره‌كانی ناو فه‌له‌ستین و ئیسرائیل، نه‌یجیریا، هیندستان، عێراق، یه‌مه‌ن و سۆماڵه.
دین و خورافه له‌هه‌ر شوێنێكی دنیادا لاواز بێت، ئه‌وا له‌و شوێنه‌دا هه‌نگاو نان به‌ره‌و سكۆلاریزم، ئازادی و یه‌كسانی وبه‌دیهێنانی كۆمه‌ڵگایه‌كی باشتر و خۆشگوزه‌رانتر و هه‌روه‌ها هه‌نگاو به‌ره‌و ڕزگاری یه‌كجاری له‌ته‌واوی مه ینه‌تیه‌كان و به‌دیهێنانی سۆسیالیزم وكۆمۆنیزم ڕێگایه‌كی كورتتری ده‌وێت. .بۆیه ئه‌ركی وهه‌ر ئه‌مڕۆ یه كه به‌رانبه‌ر ته‌واوی ئه‌و هه‌وڵانه بوه‌ستینه‌وه كه دین وه‌ك شتێكی پیرۆز ڕاده‌گرێت وه ده‌یه‌وێت بۆ هه‌تا هه‌تا له‌گه‌ردنی خه‌ڵكیدا نه‌ك هه‌ر بمێنێته‌وه، به‌ڵكو قابیلی ده‌ست لێدان و لابردنیشی نه‌بێت.!! بۆ ئه‌وه‌ی چیتر ده‌سه‌ڵاتی فاشیستیی و دینیی حاكم له ئیسرائیل و بزوتنه‌وه ئیسلامی ومه‌زهه‌بیه‌كانی فه‌له‌ستین خه‌ڵكی ئه‌و وڵاته نه‌كه‌نه قوربانیی به‌رژه‌وه‌نیه تایبه‌ته‌كانی خۆیان، چیتر ژنانی ئه‌فغانستان، ئێران، یه‌مه‌ن، سۆماڵ، سعودیه، سودان وعێراق و پاكستان و چه‌نده‌ها شوێنی دیكه‌ی سه‌ر ئه‌م گۆی زه‌ویه كه ده‌سه‌ڵاتی دینی و شه‌ریعه تیا باڵاده‌سته، له‌م سه‌رده‌می ته‌كنۆلۆجیا پێشكه‌وتنه‌دا، به‌دڕندانه‌ترین شێوه به‌رده‌باران نه‌كرێن و به‌ر شاڵاوی خه‌نجه‌رو شمشێر و گوێزان نه‌كه‌ون. ده‌بێت به‌ره‌ی پێشكه‌وتنخوازو ئازادیخواز، چه‌پ و كۆمۆنیسته‌كان و هه‌موو ئه‌وانه‌ی كه دڵیان بۆ یه‌كسانی و خۆشگوزه‌رانی و دنیایه‌كی باشتر لێده‌دا، ئه‌م مه‌سه‌له‌یه به هه‌ند وه‌ربگرن و خه‌بات بۆ ئه‌وه بكه‌ن كه دین جگه له‌وه‌ی كه ته‌نها مه‌سه‌له‌یه‌كی ڕووتی تایبه‌ت به‌خودی شه‌خسیی ئینسانه‌كه خۆیه‌تی، هیچ شتێكی تر نیه و ده‌بێت دین له هه‌موو مه‌یدانه‌كانی تری ژیان بكرێته ده‌ره‌وه‌و گه‌ر وانه‌بێت ئه‌وه ته‌نها به‌رژه‌وه‌ندی سه‌رمایه‌و سه‌رمایه‌داری ده‌پارێزێت و به‌غه‌یری مانه‌وه‌و درێژه‌دان به كۆیله‌تی هیچ ئاكامێكی تری نابێت. هه‌ر هه‌نگاوێك چه‌نده بچوكیش بێت، گه‌ر به‌ردێك له به‌رده‌كانی دیوارو په‌یكه‌ره‌ی دین و خورافه لاببات، ئه‌وا ده‌ستی بۆرژوازی و سه‌رمایه له وه‌سیله‌ی هه‌ڵخه‌ڵه‌تاندن و هه‌وڵدانی ئه‌و بۆبه‌دواكه‌وتوویی هێشتنه‌وه‌ی كۆمه‌ڵگا خاڵی ده‌كه‌ینه‌وه‌و هوشیاریی كۆمه‌ڵگا به‌ره‌و سكۆلاریزم به‌ره‌و ئازادی و یه‌كسانی گه‌شه پێده‌ده‌ین و ده‌توانین هه‌نگاوی گه‌وره به‌ره‌و ڕزگاری یه‌كجاری سۆسیالیزم هه‌ڵبهێنین. بنه‌بڕكردنی ده‌سه‌ڵاتی سیاسیی دین له‌ڕیشه‌وه ولابردنی ئه‌و دێوه‌زمه‌یه له‌سه‌ر سنگی كۆمه‌ڵگا بۆ هه‌تا هه‌تایی ئه‌وه ته‌نها ئه‌م ڕێگایه‌ی ئه‌خیره كه ئه‌ویش سۆسیالیزم كۆمۆنیزمه..