سه‌ربه‌خۆیی کوردستان رێگا چاره‌ی هه‌ر ئێستایه!
له دوای گرتنی موصل و شاره‌کانی تری سونه نشین له‌لایه‌ن ده‌وڵه‌تی ئیسلامی له عێراق وشام( داعش) و گروپه چه‌کداره ئیسلامی وقه‌ومه‌یه‌کانه‌وه و هه‌رس هێنانی سوپای عێراق و فه‌له‌ج بونی یه‌ک جاره‌کی حکومه‌ته‌که‌ی نوری مالکی له به‌غدا ، عێراق به‌ته‌واوه‌تی نوقمی شه‌ڕێکی تایه‌فی- دینی و کۆنه‌په‌رستانه بووه‌و به‌ته‌واوه‌تی دابه‌ش بووه بۆ سێ ده‌وڵه‌تی جیا له‌یه‌کتر، دروست بوونی جه‌نگێکی کۆنه‌په‌رستانه که ته‌ڕ ووشک ده‌سوتێنی. هه‌زارن که‌س تا ئێستا بوون به قوربانی و نزیکه‌ی دوو ملیون که‌س ئاوه بوون. وئێستا کوردستان به‌ته‌واوه‌تی له‌گه‌ڵ به‌غدا له‌یه‌ک دابڕاوه‌و هه‌موو ئه‌و پارێزگایانه‌ی که کوردستان ده‌به‌سن به به‌غداوه که‌وتوه‌ته ده‌ست داعش وگروپه چه‌کداره‌کان، موصل و تکریت و ئه‌نبارو دیاله و به‌شێک له‌که‌رکوک له ژێر ده‌ستی ئه‌م ده‌سته‌و تاقماندایه و حکومه‌ته‌که‌ی مالیکی نه‌یتوانیوه چه‌ند کیلۆمه‌ترێک ئه‌م هێزانه پاشه کشه پێ بکات.
ئێمه پێشتر ئه‌گه‌ری ڕوودانی ئه‌م ئه‌وزاعه‌مان له بڕێارنامه‌کانی مه‌کته‌ب سیاسی و به‌یانامه‌کانماندا ڕوون کردوه‌ته‌وه، به تایبه‌تی دوای به‌هاری عه‌ره‌بی و دوای کشانه‌وه‌ی هێزه‌سه‌ربازیه‌کانی ئه‌مه‌ریکا کارکردی ئه‌م دوو فاکته‌ره له‌سه‌ر وه‌زعی سیاسی ناجێگیری عێراق‌و ئه‌گه‌ری هه‌ڵکشانی شه‌ری تایه‌فی و قه‌ومی له عیراقمان پێشان دابوو. ئێستاش ئه‌م وه‌زعه‌ی هاتوه‌ته پێش به‌رهه‌می ڕاسته‌و خۆی کێشمه کێشه ناوچیه‌کان و ته‌قینه‌وه‌ی بارودۆخی ناوچه‌که و شکستی سیاسه‌تی ئه‌مریکا و غه‌ربن له عێراقدا. ئاسۆی چاره‌سه‌ری ئه‌م وه‌زعه له چوارچیوه‌ی عێراق و دامه‌زراندنی ده‌وڵه‌تێکی مه‌ده‌نی و دورخستنه‌وه‌ی کۆمه‌ڵگه له جه‌نگی خوێناوی له سای ده‌ستێوه‌ردانی ده‌وڵه‌ته ئیسلامی وکۆنه‌په‌رسته‌کانی ناوچه‌که وه‌ک جمهوری ئیسلامی ئێران و سعودیه وقه‌تر وتورکیا کارێکی ئاسان نیه‌و کۆمه‌ڵگه‌ی عێراق چاوه‌ڕێی کاره‌ساتی زۆر پڕ مه‌ترسیه، بۆیه جارێکی تر خستنه ڕووی سه‌ربه‌خۆی کوردستان به توندی و جدیه‌تیکی زۆره‌وه خۆی مه‌ته‌رح ده‌کات لانی که‌م بۆ پاراستنی به‌شێک له‌م کۆمه‌ڵگه‌یه له ئاگرو خه‌ته‌ری ئه‌م جه‌نگه.
پرۆژه‌ی سه‌ربه‌خۆیی کوردستان پرۆژه‌ی کۆمۆنزمی کرێکای بووه له سه‌ره‌تای نه‌وه‌ده‌کانی سه‌ده‌ی ڕابردوه‌و له‌و کاته‌وه کۆمۆنزمی کرێکاری پا فشاری کردوه له جیابونه‌وه‌ی کوردستان وه‌ک ڕێگا چاره‌ی ئه‌وزاعێکی سیاسی له کوردستان و بۆ چاره‌سه‌ری ڕێشه‌یی کێشه‌ی کورد و کۆتایی هێنان به کێشه‌یه‌ک که ده‌یان ساڵه له‌م ناوچه‌یه‌دا خۆینی له‌سه‌ر دڕێژری.جیآبونه‌وه‌ی کوردستان قبوڵکردنێکی ناچاڕیه و بۆ کۆتایی هێنانه به کێشه‌یه‌ک که ڕێگره له‌به‌رده‌م یه‌کگرتنی چینایه‌تی دڵخوازدا.
له ئێستادا حزبی کۆمۆنستی کرێکاری چه‌پی عێراق جیابونه‌وه‌ی کوردستان له‌ڕێگای به‌رپاکردنی ڕفراندومه‌وه له‌سه‌راسه‌ری کوردستاندا بۆ جیابونه‌وه یان مانه‌وه له چوارچێوه‌ی عێراقدا, که حزب ته‌وصیه به ده‌نگدان ده‌کات بۆ جیابونه‌وه، به باشترین ڕێگا ده‌زانێ بۆ دورخستنه‌وه‌ی کوردستان له ئاگری جه‌نگی تایه‌فی و دینی و چاره‌سه‌ری یه‌ک جاره‌کی کێشه‌ی کورد له عێراقدا. ئه‌مه هه‌رچی زوتر ئه‌نجام بدرێت دره‌نگه چونکه ئه‌گه‌ر هێزه‌کانی ئیسلامی سیاسی و ناسێونالیزمی عه‌ره‌بی خۆیان سازبده‌نه‌وه له حکومه‌تی مه‌رکه‌زیدا یه‌که‌م کارێک که ده‌یکه‌ن په‌لاماری کوردستانه به‌تایبه‌ت بۆ سه‌ر که‌رکوک. جیابونوه‌ی کوردستان له‌ڕیگای ده‌نگ دانی گشتی خه‌ڵکی کوردستانه‌وه شه‌رعیه‌ت ده‌دا به‌م جیابونه‌وه‌ویه له‌لایه‌ن خه‌ڵکه‌وه و هێڕش کردنه سه‌رکه‌رکوک یان هه‌ر به‌شێکی تری کوردستان له‌لایه‌ن حکومه‌تی به‌غداوه زۆربه قورس ته‌واو ده‌بێت و ئاسان نابێت.
به‌دوای ڕوداوه‌کانی موصلدا ناسیونالیزمی کورد و به‌تایبه‌تی مه‌سعود به‌رزانی و پارتی دیموکراتی کوردستان ناوه ناوه باس له‌جیابونه‌وه ده‌که‌ن " ده‌ڵێن یا شه‌راکه‌تی ڕاسته‌قیه یان جیابونه‌وه" و هیچ پرۆژه‌یه‌کی واقعیان پێشان نه‌داوه بۆ پرۆسه‌ی جایبونه‌وه ئه‌مه‌ش زیاتر له چوارچێوه‌ی فشار بۆ سه‌همی زیاتر بۆ ده‌سه‌ڵات له عێراق خۆی پێشانده‌دات. سه‌ربه‌خۆی کوردستان یه‌کێک له مه‌سه‌له چاره‌نوسازه کانه له ئه‌مڕۆدا ناسیونالسته‌کان لایه‌نگری بن یا نه‌بن له ماهیه‌تی ناگۆڕی به‌ڵکو هه‌نگاوێکی جدیه بۆ وه‌لا نانی هه‌ژه‌مونیان له سه‌ر کۆمه‌ڵگه و ڕووهێنانی جه‌ماوه‌ره بۆ داواکاریه سه‌ره‌کیه‌کانیان به‌تایبه‌ت هێنانه سه‌رکاری ده‌وڵه‌تێک نوێنه‌رایه‌تی ڕاسته‌قینه‌ی خه‌ڵکی کوردستان بکات. جیابونه‌وه ڕێگا چاره‌یه‌کی ئه‌مڕۆیه بۆ دورخستنه‌وه‌ی کوردستان له جه‌نگ و کوشت وکوشتار، کۆتایی هێنانه به قوڵکردنه‌وه‌ی ده‌مارگیری نه‌ته‌وه‌ی و ته‌قسیم به‌ندی له‌سه‌ر پێناسه‌ی نه‌ته‌وه‌ی و کۆتایی هێنانه به کێشه‌ی نێوان "کورد" و"عه‌ره‌ب" هه‌نگاوێکی گرنگه بۆ سارێژ کردنی ئه‌و دابڕانه‌ی خه‌ڵکی ناوچه‌که که به ده‌یان ساڵه ناسێونالیزمی عه‌ره‌ب وکورد له جه‌سته‌ی ئه‌م کۆمه‌ڵگه‌یه دروستیان کردوه.
له ئێستادا سه‌رکه‌وتنی جیابونه‌وه‌ی کوردستان له هه‌موو کاتی زیاتر فرسه‌تی هه‌یه له هه‌موو کاتی زیاتر ده‌و‌له‌تانی ناوجه‌که که به‌دژی بوون، هه‌ڕه‌شه‌ی هێڕش کردنه سه‌رکوردستانیان هه‌بووه ده‌ستیان به‌ستراوه‌ته‌وه، عێراق خۆی فه‌له‌ج بووه‌و سوپاکه‌ی هه‌ره‌سی هێناوه و گیرۆده‌ی ده‌ستی شه‌ڕی هێزه‌کانی داعشه، ئێران له قه‌یرانێکی فرواندایه له ژێر مه‌نگه‌نه‌ی غه‌رب وئه‌مریکادایه له ناوخۆشدا له‌به‌رده‌م ناڕه‌زایه‌تی خه‌ڵکدایه، سوریا به‌ته‌واوه‌تی ناتوانی هیچ هه‌نگاوێک بنێت له‌به‌ر وه‌زعی ناوخی خۆی، تورکیا تا ڕاده‌یه‌ک لایه‌نگری ئه‌م جیابونه‌وه‌یه‌یه و به به‌رژه‌وه‌ندی خۆی ده‌زانێ. وه‌ک پێده‌چی له ئه‌وروپاش سه‌مپاتی هه‌بێ بۆ جیابونه‌وه‌ی کوردستان، بۆیه له‌ئاستی نێو ده‌وڵه‌تی و ناوچه‌ییدا جیابونه‌وه‌ی کوردستان ده‌توانی جێگای خۆی بکاته‌وه به‌بێ ئه‌وه‌ی خه‌ته‌رێکی زۆری بکه‌وێته سه‌ر. ئه‌وانه‌ی له‌ئێستادا پێیان وایه جیابونه‌وه ده‌رگای جه‌نگ به‌ڕووی کوردستاندا ده‌کاته‌وه تێڕوانینێکی نادروست و خوێندنه‌وه‌یکی باشێان نیه بۆ بارودۆخه‌که‌و خۆیان ته‌ریک ده‌که‌ونه‌وه له کۆمه‌ڵگه‌ی کوردستاندا.
ئێمه سه‌ره‌ڕای هه‌ڵوێستی ده‌وڵه‌ته‌کانی ناوچه‌که، له ڕونگه‌ی به‌رژه‌وه‌ندی خه‌ڵکی کورستان و خه‌ڵکی عێراقه‌وه جیابونه‌وه‌ی کوردستان وه‌ک ڕێگا چاره‌ی هه‌نوکه‌یی ده‌خه‌ینه ڕوو پێمان وایه جیابونه‌وه‌ی کوردستان کۆمه‌ک ده‌کات به ڕزگار بونی خه‌ڵک له بیرو باوه‌ڕی ناسێونالستی و هه‌روه‌ها ڕزگاریان ده‌کات له‌و کێشه یه‌ی که ده‌ست وپێی خه‌لكی به‌ستوه بۆ تێکۆشان له پێناو به‌رژه‌وه‌نده چینیه‌تیکانیاندا و بوارێکی باش ده‌خولقی له عێراقیشدا بۆ خه‌باتی چێنایه‌تی و خه‌بات له پێناو ئازادی و یه‌کسانی و خۆشگوزه‌رانیدا.
حزبی کۆمۆنیستی کرێکاری چه‌پی عیراق ئه‌م خاڵانه وهه‌نگاوانه ده‌خاته ڕوو بۆ جیابونه‌وه‌ی کوردستان:
1- به‌رپاکردنی ڕفراندۆم له‌و ناوچانه‌دا که پێیان ده‌وترێ ناوچه جێناکۆکان بۆ په‌یوه‌ست بوون به کوردستان یان مانه‌وه له چوارچیوه‌ی عێراقدا و یه‌کلاکردنه‌وه ئه‌م کێشه‌یه پێش ڕیفراندۆم له‌سه‌راسه‌ری کوردستاندا. ئێمه ته‌وصیه ده‌که‌ین هه‌موو خه‌ڵکی به کورد و عه‌ره‌ب و تورکمان زمانه‌وه له‌م ناوچانه ده‌نگ بده‌ن به په‌یوه‌ست بوون به کوردستانه‌وه و پێمان وایه ئه‌مه له‌به‌رژوه‌ندی هه‌مواندایه.
2- به‌رپاکردنی ڕفراندۆم له‌سه‌راسه‌ری کوردستاندا بۆجیابونه‌وه‌ی کوردستان و دامه‌زراندنی "ده‌وڵه‌تی کوردستانی سه‌ربه‌خۆ" و ئازاد یان مانه‌وه له چوارچیوه‌ی عێراقدا له ژێر چاودێری نه‌ته‌وه یه‌کگرتوه‌کان و ئورگانه نێو ده‌وڵه‌تیه‌کان و به ئاماده بوونی ڕاگه‌یا‌ندنه جیهانیه‌کان.
3- دیاری کردنی ماوه‌یه‌کی دیاری کراو بۆ خستنه ڕووی به‌رنامه‌و پرۆژه‌ی هێزه سیاسیکان سه‌باره‌ت به جیابونه‌وه یان جیانه‌بونه‌وه که له شه‌ش مانگ تێنه‌په‌ڕێ.
4- حزبی ئێمه تێده‌کۆشی بۆ دامه‌زراندنی "ده‌وڵه‌تی کوردستانی سه‌ربه‌خۆ" نه‌ک "ده‌وڵه‌تی کوردی" ده‌وڵه‌تێک که له‌سه‌ر بنه‌مای هاوڵاتی بونی یه‌کسان دامه‌زرابێ و ده‌وڵه‌تێکی غه‌یره قه‌ومی وغه‌یره دینی بێت.
5- دامه‌زراندنی ئورگانه‌کانی به‌رپاکردنی ڕیفراندۆم له ده‌ره‌وه‌و ناوه‌وه‌ی کوردستان.
ئێمه وه‌ک حزبی کۆمۆنستی کرێکاری چه‌پی عێراق بانگه وازی سه‌رجه‌م خه‌ڵکی کوردستان وهه‌موو هێزه کۆمۆنستی و چه‌پ و ئازادیخوازو سکۆلاره‌کان ده‌که‌ین بۆ پشتیوانی له‌م پرۆژه‌یه و سه‌رخستنی و پێێان ڕاده‌گه‌یه‌نین ئه‌مه سالم ترین ڕێگایه بۆ ده‌رباز کردنی کۆمه‌ڵگه‌ی کوردستان له سیناروی ڕه‌ش که له‌ده‌رگای هه‌موو ماڵێک ده‌دات، هه‌روه‌ها ڕایده‌گه‌یه‌نین جیابونه‌وه‌ی کوردستان ده‌ستی چێنی کرێکار و خه‌ڵکی کوردستان ئاوا‌ڵه ده‌کات بۆ خه‌بات له‌دژی ناسێونالیزمی کورد و هیزه کۆنه‌په‌رسته‌کاندا که بیست وسێ ساڵه ئه‌م وڵاته به‌تاڵان ده‌به‌ن و بۆ وه‌لا نانی ده‌سه‌ڵاتی سیاسیان به‌سه‌رکوردستانه‌وه و بۆ دامه‌زراندنی ده‌وڵه‌تێکی ئازاد ویه‌کسان و خۆشگوزه‌ران.
مه‌کته‌ب سیاسی حزبی کۆمۆنستی کرێکاری چه‌پی عێراق
21\7\2014