له په‌راوێزی ڕووداوه‌کانی عيراقدا !!!
فیدراڵیه‌ت ،بارهێنانی نه‌وه‌یه‌ک له توندڕه‌وانی ئیسلامی، حوکمی ئیعدام،هۆلۆکۆستی ئسلامی!!!
سمیر نوری
ئه‌مانه تایتڵی به‌شێک له ڕوداوه‌کانی ئه‌مڕۆی عێراق پێک ده‌هێنن ، هه‌ر ڕادیۆ یان ئێزگه‌یه‌کی ته‌له‌فزیون ده‌که‌یته‌وه یان چاو ده‌خشێنی به هه‌ر ڕۆژنامه‌یه‌کدا پڕه له جۆرێک له‌م جۆره باسانه. کۆمۆنیزمی کرێکاری له‌یه‌که‌م رۆژه‌کانی ئه‌گه‌ری ڕودانی شه‌ره‌وه بۆ سه‌ر عێراق ڕۆشنی کرده‌وه که ئه‌م شه‌ڕه چی سه‌رنجامێکی وه‌خیم وخه‌ته‌رناک به‌رةنجام دێنێ، وا ئه‌مڕۆ به چاوی خۆمان راستی و دروستی ئةو تێگه‌یشتنه له سه‌رنجامه‌کانی ئه‌و جه‌نگه ده‌نینین.
فیدراڵیه‌ت!
"په‌رله‌مانی عێراق"ئه‌مه چه‌ند دانشتن ده‌کات پرۆژه‌ی دابه‌ش کردنی عێراق به‌سه‌ر چه‌ند ناوچه‌ی فیدراڵیه‌وه ده‌داته به‌رباس و لێکۆڵینه‌وه ، ئه‌م پرۆژه‌یه له‌لایه‌ن شیعه‌کانی ناو په‌رله‌مانی عێراقه‌وه خراوه‌ته ڕوو، به پاڵپشتی کتله‌ی هاوپه ي‌مانیتی کوردستان. باسی دابه‌ش کردنی عێراق نه‌ته‌نها له‌لایه‌ن هێزه سیاسیه‌کانی عێراقه‌وه وڕوژێنراوه ، به‌ڵکو له‌لایه‌ن سیاسه‌تمه‌دارانی ناسراوی ئامریکاشه‌وه چه‌ند جار وه‌ک رێگای چاره‌ی ده‌رچوون له جه‌نگی ناوخۆی عێراق که ئه‌مه‌ریکا تێیدا گیری کردووه،خراوه‌ته ڕوو.
دروست کردنی حکومه‌تی فیدراڵی یه‌ک پرۆژه‌ی سیاسی ئه‌مه‌ریکا و نه‌زمی نوێی جیهانیه‌که‌یه‌تی که به‌رهه‌می ته‌عریف کردنی کۆمه‌ڵگه‌یه وه‌ک کۆکراوه‌ی قه‌وم و قه‌بیله و نه‌ته‌وه و، دین و، مه‌زهه‌ب و، عه‌شیره‌ت و تایفه، ته‌عریف کردنی کۆمه‌ڵگه وه‌ک " مۆزایکێکی جوان" که گوایه هه‌موو ڕه‌نگه‌کانی تێدایه، داماڵێنی کۆمه‌ڵگه‌یه له‌وه‌ی ته‌عریفی یه‌ک کۆمه‌ڵگه‌ی زیندوو له ئینسانه‌کان بێت. سه‌رنجام هه‌ر یه‌ک له کۆمه‌ڵێک له به‌شه‌ره‌کان به پێی مه‌زهه‌بێکی دیاری کراو یان زمانێکی دیاریکراو که هه‌یانه هه‌ر یه‌کێکان شاخ و باڵیان لێدروستکراوه‌و به پێی ئه‌و تایبه‌تمه‌ندیانه نابێ به‌یه‌‌که‌وه بگونجێن به‌رژه‌وه‌ندیه‌کانیان دژ به به‌رژه‌وه‌ندی یه‌کتره، له سه‌ر ئه‌م بنچینه‌یه‌وه ده‌بێ دابه‌ش بکرێن بۆ ناوچه‌ی جیاجیا، له په‌رله‌مانێکدا هه‌موو ئه‌م قه‌وم دین و تایه‌فه و میلله‌تانه ده‌بێ نوێنه‌رایه‌تی بکرێن. ئه‌مه هێچ په‌یوه‌ندیه‌کی نیه به کۆمه‌ڵگه‌ی مه‌ده‌نیه‌وه که ئینسانه‌کان وه‌ک هاوڵاتی یه‌کسان پێناسه ده‌کرین، بگره رێک له نه‌فی کردنه‌وه‌ی ئه‌م کۆمه‌ڵگه‌یه‌دا ڕاده‌وه‌ستێته‌وه.
فیدراڵیه‌ت یه‌ک پرۆژه‌ی کۆنه‌په‌رسته، یه‌کێکه له ئاکامه پڕ خه‌ته‌ره‌کانی جه‌نگی ئه‌مه‌ریکا له دژی عێراق، کۆمه‌ڵگه‌ی عێراقی دابه‌شکردوه بۆ ناوچه‌ی جیاجیای دژ به یه‌ک که هه‌ریه‌ک له هێزه کۆنه‌په‌رست و دژی ئینسانیه‌کان تێدا ده‌ستی باڵایان هه‌یه و له دژی ناوچه‌و شوێنه‌کانی تر خه‌ریکی هێزکۆکردنه‌وه‌ن. ئه‌م پرۆژه‌یه نه‌ک ناتوانی کێشه‌کانی ئه‌مڕۆی عێراق چاره‌سه‌ر بکات به‌ڵکو خۆی سه‌رچاوه‌ی خولقاندنی جه‌نگی زۆر ترسناک و مه‌رگبارو تیابردنی ده‌یان وسه‌دان هه‌زار که‌سی یه.
ئه‌م پرۆژه‌یه نه‌ک ناسێوناڵست و کۆنه‌په‌رستانی ئیسلامی پشتیوانیان لێ کرد بگره هه‌ندێ لایه‌نی خۆ به چه‌پ زانی وه‌ک " یه‌کێتی کۆمۆنیسته‌کانی عيراقي " له گه‌ڵ خۆیدا ڕاپێچی ئه‌م زه‌لکاوه کرد، وه‌ک ریگه چاره‌ی کوردستان پشتیوانیان لێکرد.
ئه‌م پرۆژه‌یه نه‌ک عيراق ناکا به ماستی مه‌یو بگره له‌سه‌ر یه‌ک بست زه‌وی هێزه‌کانی ناسێۆناڵزمی عه‌ره‌ب و ناسێوناڵزمی کورد و ئیسلامی سیاسی ئه‌کێشن به‌یه‌کدا نه‌ک شاره‌کان دابه‌ش ده‌که‌ن بگره له‌سه‌ر دابه‌شکردنی گه‌ره‌که‌کانی به‌غداو که‌رکوک به چه‌قۆی کول سه‌دان که‌س ده‌ده‌نه سه‌ربڕین هه‌ر چۆن ئێستا ده‌یبینین.
ئه‌م پرۆژه‌یه به‌هیچ جۆری جێگای پشتیوانی کۆمۆنیسته‌کان،و ئازدیخوازان و لایةنگرانی دامه‌زراندنی کۆمه‌ڵگه‌ی مه‌ده‌نی نی یه.
"جه‌نگی عێراق و بارهێنانی نه‌وه‌یه‌ک له توند ڕه‌وانی ئیسلامی"
به پێی ڕاپۆرتێک که یه‌کێک له رۆژنامه‌کانی ئه‌مه‌ریکا بڵاوی کردوه‌ته‌وه که راپۆرته‌که ده‌گه‌ریته‌وه بۆ موخابه‌راتی ئه‌مه‌ریکی و هه‌روه‌ها جۆرج بۆش ره‌زامه‌ندی داوه له بڵاوکردنه‌وه‌ی به‌شێک له ڕاپۆرته‌که،ڕاپۆرته‌که ئه‌وه پێشان ده‌دات که جه‌نگی ئه‌مه‌رێکا له دژی عێراق نه‌وه‌یه‌ک له توندڕه‌وانی ئیسلامی له‌سه‌راسه‌ری جیهاندا به‌رهه‌م هێناوه. ئه‌مه سه‌رنجامێکه به پێچه‌وانةی ئه‌وه وه‌یه که ڕاست ڕه‌وانی کۆنزێرڤه‌تیڤه توندره‌وه‌کان ئیدعایان ده‌کرد که ئه‌مه جه‌نگی وقائیه و ده‌بێته هۆی لاواز کردنی ئیسلامی سیاسی.
به‌دوای 11 سپته‌مبه‌ردا سیاسه‌تی ئه‌مه‌ریکا بریتیه له جه‌نگ له دژی ئیسلامی سیاسی و ئه‌م سیاسه‌ته سایه‌ی کرده سه‌ر گشت سیاسه‌تی ئه‌مه‌ریکادا، سیاسه‌تی عه‌سکه‌رتاریه‌تی جه‌نگی ئه‌مه‌ریکا له‌لایه‌ک و تیرۆریزمی ئیسلامی له‌لایه‌که‌ی تره‌وه هه‌موو ناوچه‌که‌ی داگرتوه.
دوێنی جه‌نگی ئیسرائیل له دژی حزب الله نه‌ک لاوازی نه‌کرد به‌ڵکو حه‌سه‌ن نصر الله‌ی وه‌ک ناجی خه‌ڵکی لبنان و پاڵه‌وانی قه‌ومی عه‌ره‌ب به‌هێز کرد و نه‌وه‌یه‌کی له حزب الله‌ی په‌روه‌رده‌کرد، ئه‌مڕۆ ئه‌مه‌ریکا ده‌چێته ژێر ئه‌وه‌ی که جه‌نگی ئه‌مه‌ریکا نه‌وه‌یه‌کی له توندڕه‌وانی ئیسلامی بارهێناوه.
ئه‌مه ئه‌و حه‌قیقه‌ته ته‌ئکید ده‌کا که ئه‌م دوو لایه‌نه له‌هه‌مان کاتدا له دژی یه‌ک له‌جه‌نگدان یه‌کتری ته‌غزیه ده‌که‌ن لهیهک هێز وه‌رده‌گرن .
ئه‌م دوو به‌ره‌یه‌ی جه‌نگ له‌به‌رامبه‌ر به‌رژه‌وه‌ندیه‌کانی خه‌ڵکدا ڕاوه‌ستاون بوونیان و سیاسه‌تێک که پیاده‌ی ده‌که‌ن له دژی به‌رژه‌وه‌ندیه‌کانی خه‌ڵکه له ناوچه‌که‌دا.
له‌سایه‌ی باڵا ده‌ستی ئه‌م دوو جه‌مسه‌ره‌ی تیرۆریزمه که ده‌یان ملێۆن ئینسان له عێراق بێ به‌شن له سه‌ره‌تایی ترین خزمه‌ت گوزاری و پیویستی رۆژانه. بالآ ده‌ستی ئه‌م دوو لایانه‌ی تیرۆرزمه که چاره‌سه‌ر کردنی کێشه‌ی فه‌له‌ستینی ته‌سلیم به چاره‌نووسێکی نادیار کردوه.
جێبه‌جێ کردنی سزای ئیعدام!!
پێش چه‌ند رۆژ حکومه‌تی کوردستان ده‌سته‌یه‌کی له‌و زیندانیانه که سزای ئیعدام به‌سه‌ریاندا درا بوو که به گروپه‌که‌ی شێخ زانا ناسرابوون جیبه‌جێ کرد، پێش چه‌ند رۆژیش له به‌غدا گروپێکی تر ئه‌م سزایه‌یان به‌سه‌را جێ به‌جێ کرا.
سزای ئیعدام که یه‌ک تاوانی دڕنده‌و بێ به‌زیانه‌ی سه‌رده‌مه‌کانی به‌ربه‌ریه‌ته، خۆی کوشتنی ئه‌نقه‌ست و به‌رنامه بۆ دارێژراوی ده‌وڵه‌تیه(قه‌تڵی عه‌مد)، ئه‌م سزایه که له‌زۆرێک له وڵاتانی دنیادا به ڕێوه ده‌برێ، چه‌ندان ته‌بریری بۆ دارێژراوه بۆ پاساو کردنی، به‌ڵام ڕوو به ڕووی ناڕه‌زایه‌تی فراوان بووه‌ته‌وه له‌لایه‌ن کۆمۆنیسته‌کان و ئینسان دۆستان و له زۆرێک له وڵاتانی دنیا ئام سزا درنده و به‌ربه‌ریه‌ته هه‌ڵوه‌شاوه‌ته‌وه.
به‌ڵام له وڵاتانی رۆژهه‌ڵاتی ناوه‌ڕاست دا که ئیسلامیه‌کان و ناسێۆناڵست و فاشسته‌کان تێیدا باڵا ده‌ستن له‌وپه‌ڕی درنده‌یه‌تی و بێشه‌رمیدا جیبه‌جی ده‌کرێت. له عه‌ربستانی سعودی به شمشێر ملی خه‌ڵک لهیهک جیا ده‌که‌نه‌وه و به‌به‌رچاوی خه‌ڵکه‌وه، مه‌قسه‌ڵه که له‌هیچ کویه‌کی ئه‌م دنیایه نه‌ماوه له‌م وڵاته به‌بێ هیچ حورمه‌ت دانانیک بۆ ئینسانیه‌ت و ده‌سکه‌وته‌کانی جێ به‌جێ ده‌کرێت. حکومه‌تی به‌عس سه‌رباری به‌کار هێنانی چه‌کی کیمیایی و قه‌تڵ و عام کردنی به کۆمه‌ڵی خه‌ڵک، له مێژووی ڕه‌شی خۆیدا چه‌ندان کۆمه‌ڵی له ئۆبزسیونی خۆی له‌سیاچاڵه‌کانیدا ئیعدام کرد. جمهوری ئیسلامی ئێران به قه‌سابی کردنی ده‌یان هه‌زار که‌س له چه‌پ و کۆمۆنیست و ڕابه‌رانی کرێکاری و ئۆپزسیونی خۆی به جێبه‌جیکردنی سزای ئیعدام و به‌ری خستنی ڕووباری خوێن توانیویه‌تی دوو ده‌یه و نیو درێژه به عومری نه‌نگینی خۆی بدات.
ئه‌مڕۆ له عراقدا هێزه میلێشیا چه‌کداره‌کان سه‌ره‌ڕای کوشتنی ده‌یان که‌س ڕۆژانه‌یان له ده‌ستوره کۆنه‌په‌رست و ئیسلامیه شه‌رم ئاوه‌ره‌که‌یاندا سزای ئیعدامیان وه‌ک یه‌کێک له‌به‌نده‌کانی ده‌ستوور جێگیر کردووه. وه هێچ یه‌ک له‌و هێزانه نیه ئه‌م سزایه بخاته ژێر پرسیاره‌وه بگره به هه‌زار و یه‌ک ده‌لیلی بێ بناغه سه‌رسه‌ختانه دیفاعی لێده‌که‌ن، سه‌رک کۆمار به قه‌ولی خۆی ئیمزای داوه له‌وه‌ی دژی ئیعدام بێت به‌ڵام ملی خۆی لێ خه‌واندووه وه‌ک بڵێی نه بای دی بێ نه باران. نه‌ک هه‌ر ئه‌وه‌نده به‌ڵکو ئه‌و تاوانانه‌ی که حکومه‌تی به‌عس به‌حقی زیندانتانی سیاسی و ئیعدام کردنیان به کۆمه‌ڵ نه‌بووه‌ته یه‌کێک له تاوانه‌کانی ئه‌و ڕژێمه، نه‌بادا دووقسه له‌سه‌ر حوکمی ئیعدام و هه‌ڵوه‌شانه‌وه‌ی ئه‌م جه‌ریمه بخرێته ڕوو.
ئه‌مڕۆ ئیتر ئه‌م سزایه چووه‌ته بواری جێبه‌جی کردنه‌وه، ئه‌وه چه‌ند گروپ ئیعدام بکرێن له عراقدا، بۆرجوازی به چنگ و به ددان دیفاع له‌م یاسایه ده‌کات به یه‌کێک له ڕووکنه‌کانی خۆی ده‌زانێت، هه‌تا بۆ حکومه‌ته کارتۆنیه‌که‌ی به‌یه‌کێک له گۆپاڵه سیحریه‌کانی ده‌زانێت بۆ جێگیر کردنی خۆی، وده‌رچوون له بوحرانێک که هیج ئاسۆیه‌کی چاره‌سه‌ر بوونی له هێچ کۆییه‌که‌وه دیار نی یه.
سزای ئیعدام یه‌ک جه‌ریمه‌ی ئه‌نقه‌سته له‌لایه‌ن ده‌وڵه‌ته‌وه ئیجرا ده‌کرێت، نه تاوان له‌م ریگایه که‌م ده‌بێته‌وه، نه ئه‌توانێت برینی ئه‌وانه سارێژ بکات که جه‌ریمه‌یان به حه‌ق ئانجام دراوه. ئه‌مه ڕووکنێکی بنچینه‌یی داسه‌پاندنی حکومه‌ته ئستبدادی و ملهوره‌کانی ناوچه‌که‌یه، بۆ به‌ده‌ست هێنانی هه‌ر داواکاریه‌کی به‌رحه‌ق له کۆمه‌ڵگه‌دا پێویست به‌‌وه ده‌کات ڕوو به‌ڕووی ئه‌م حوکمه درندانه‌یه بووه‌ستینه‌وه.
هۆلۆکۆستی ئيسلامی!!!
دوو توێێ هه‌ر رۆژنامیه‌ک ده‌کةیته‌وه پێچی هه‌ر ڕادێویه‌ک ده‌سووڕێنی یا کۆنترۆڵی ته‌له‌فزێونێ به‌کاردێنی ته‌له‌فزێنه‌که‌ت داده‌گرسێنی سه‌ردێڕی هه‌واڵه‌کان که‌م جار هه‌یه عيراق نه‌بێ و هیچ جارێکیش نیه کۆمه‌ڵيک ئینسانی بێ ده‌ست پێ و سه‌ری بێ لاشه نه‌بینی، گۆل گۆل خۆین کۆمه‌ڵه‌ی نه‌کردبێ، کۆمه‌ڵێک خه‌ڵکیش به چه‌پۆک نه‌کێشن به سه‌ری خۆیاندا،یان زه‌رقاویه‌کان ئۆتۆمبیلیکان ته‌قاندوه‌ته‌وه، یان موقته‌دا سه‌دریه‌کان موخالفینی خۆیان کوشتوه و سه‌ربڕیوه یان ته‌سور ده‌کرێ داروده‌سته‌ی حکومه‌ت هڕشیان کردوه‌ته سه‌ر مزگه‌وتێکی سونه یان گه‌ره‌کێكي سوونه ، یان کۆمه‌ڵێک لاشه‌ی دۆزراوه‌ن که ده‌ستیان به‌ستراوه‌ته‌وه‌و گوله نراوه‌ته ته‌پڵی سه‌ریانه‌وه.
خه‌سته‌خانه‌ی به‌غدا مانگ نیه چه‌ند هه‌زار که‌سیان به کوژراوی نه‌گاته ده‌ست، گه‌ره‌که‌کان بوون به‌به‌ره‌ی جه‌نگ و ته‌سفیه کردنی یه‌کتری، ئه‌مه ئه‌توانی ناوی بنێین چی بێجگه له هۆڵکۆستی ئیسلامی. هیتله‌ر چی کرد به جوله‌که‌‌کان، ئیسلامیه‌کان به نه‌یارانی خۆیان نه‌کردبێ. خنکانی هه‌زار که‌س ناو بنێین چی له ئاوی دجله‌دا، کوشتنی کوێرانه‌ی کرێکارانی مه‌سته‌ری به‌غدا، کوشتن و ئیختساب کردنی کچانی منداڵ، ئیتر شه‌ڕی شیعه‌و سوونه خه‌ریکه شانی ده‌دا له شه‌ڕی نێوان هۆتۆکان و توتسیه‌کانی ڕاوه‌ندا. ته‌ور به‌ده‌ست و قه‌مه ده‌ستی ئیسلامی ئیتر ره‌حم به‌که‌س ناکات، منداڵی ناو بێشکه‌ش سه‌ر ده‌بڕن.
له ڕاستیدا ئام تایتڵه‌م له وتاره‌که‌ی مینا ئه‌حه‌دی له تۆرنتۆ وه‌رگرت سه‌باره‌ت به سزای ئیعدام که جمهوری ئیسلامی ئێران، چۆن ده‌یان هه‌زار که‌سی له‌ماوه‌ی چه‌ند ساڵدا ئیعدام کردووه، چی هۆلۆکۆستێکی خولقاندوه.
له ڕاستیدا ئیسلامی سیاسی بۆ ئه‌وه‌ی ده‌سةڵات بگرێته ده‌سته‌وه له هیچ جه‌ریمه‌یه‌ک سڵ ناکاته‌وه، ئه‌مه په‌یامی ئه‌وانه بۆ به‌شه‌ریه‌ت، ئه‌م په‌یامه‌ی خۆیان به رۆژی نیوه ڕۆ ده‌ده‌ن به گوێی جیهاندا، به عه‌ملیش رۆژانه جێبه‌جێ ده‌که‌ن.
ئه‌مه یه‌کێکه له جه‌مسه‌ره‌کانی تیرۆریزم له دنیادا ، ئیسلامی سیاسی له‌م سه‌ره‌وه ، ئه‌مه‌ریکا و هاپه‌یمانانی له‌و سه‌ره‌وه، ئه‌م دوو جه‌مسه‌ره هیچ به‌رژه‌وه‌ندیه‌کیان له‌گه‌ڵ به‌رژه‌وه‌ندی زۆربه‌ی هه‌ره زۆری خه‌ڵکی گۆی زه‌ویدا نایه‌ته‌وه، ده‌بێ بزووتنه‌وه‌یه‌کی تر به دژی ئه‌م دوو جه‌مسه‌ره‌ی تیرۆریزم به‌ڕێ بخه‌ین، که رێگه بگرێت به عه‌سکه‌رتاریه‌ت و جه‌نگ و هۆڵۆکۆستیک که ده‌یخولقێنن.
2\10\2006