مافی منداڵان
گفتوگۆی
بڵاوکراوەی داروگ
سەوسەن بەهار: سڵاو، هەروەها سوپاس کە بانگهێشتی "داروگ" تان بۆ ئەنجامدانی ئەم چاوپێکەوتنە قبوڵکرد.
مەنسوور حیکمەت: زۆر
سوپاس بۆ بانگهێشتنەکەتان و هەروەها
پێش هەمووشتێک هیوای سەرکەوتن بۆ خۆینەرانی بڵاوکراوەی پڕخوێنەری "داروگ" ئەخوازم.
سەوسەن بەهاری: ئێوە
لەبەرنامەی" دنیایەکی باشتر"، بەرنامەی حیزبی کۆمۆنیستی کرێکاریی ئیراندا بەشێکتان
تایبەت کردوە بە مافەکانی منداڵان، ئەگەر دەکرێت دەتوانن هۆکاری ئەم بابەتە
ڕونبکەنەوە؟
مەنسوور حیکمەت: منداڵان
و تازەلاوان یەکێک لە بێبەشترین و بێ مافترین بەشەکانی کۆمەڵگەن. قوربانیانی
بێدەنگکراوی ڕژیمی کۆمەڵایەتی ملهوڕو نایەکسانی ئێستان. لە زۆربەی کۆمەڵگەکان و
هەتا لەم ئەوروپا ڕۆژئاواییە بەناو پێشکەوتوەدا، بۆزۆرکەس هەر ئەوەی کە منداڵ
مافێکی قابیلی پێشێلنەکراویان هەیە، وە باوک ودایک وخێزان و قوتابخانە وە بەگشتی
دونیای گەورە ساڵان هەرکارێک کە دەیەوێ نەتوانێت بە ئەوی بکات، جێگای پەسندکردن
نیە. لە بەشێکی زۆری جیهان، منداڵان لە تەمەنێکی زۆر کەمەوە دەخەنە بەر کار و
بەهەزارو یەک شێوە ڕوبەڕوی چەوسانەوە و بەهەڵە سودلێوەرگرتنیان ئەکەنەوە. وە تازە
لەو جێگایانەشی کە یاسایەک هەیە کە کەمێک پێش بەم کارە قێزەونانە دەگرێت، هێشتا
منداڵ لە ماڵ و قوتابخانە توندوتیژی ئەبیستێ و ئەشکەنجە ئەدرێ. بیری لێبکەرەوە،
لێدان وشەڕکردن و ترساندنی منداڵ، برسیکردن و زیندانیکردنی، هەر لە ئەم ئەوروپای
ڕۆژئاوایەدا لە ژێرناوی پەروەردەی منداڵدا برەوی هەیە وە باوک ودایکان و زۆرێک لە
قوتابخانەکان ئەم توندوتیژیە لە دژی منداڵان بە مافێکی خۆیان دەزانن. لەم
تێڕوانینەوە منداڵان هیچ جیاوازیەکیان لەگەڵ خەڵکی بەشمەینەتدا نییە، ئەبێت بۆ
ئازادکردنیان هەوڵبدرێت وە هێچ حزبێکی سیاسی ناتوانێت خۆی بە لاینگری ئازادی و ماف
و یەکسانی بزانێت، بە بێ ئەوەی زۆر ڕۆشن و لێبڕاوانە لەپیناو مافەکانی مناڵاندا
خەبات بکات. من وەک خۆم وابیر دەکەمەوە بۆ ئەوەی ئازادیخوازی هەر کەس، چ تاک ،چ
حیزب وە چ دەوڵەت، باشتر بناسین ئەبێت بەر لە هەر شتیک سەیری ڕەفتاریان بکەین لەگەڵ
منداڵاندا.
سەوسەن بەهاری: ئایا
ئەم مافانە هەر ئەمڕۆ بۆ هەموو منداڵانی جیهان لەبەرچاودەگریت؟
مەنسوور حیکمەت: بە
دلنیاییەوە، بەبێ هیچ تێبینی و ئەگەر و ئەمایەک. ئەوەی کە ئیستا ئێمە لەبەرنامەدا
نوسیومانە هێشتا هەنوکەیترین داخوازییە لانیکەمەکانی ئێمەیە. زۆر کاری زیاتر هەیە
کە بۆ گەیشتنی منداڵان بە مافەکانیان وە بەهرەمەندبونیان لە ژیانێکی شاد و
داهێنەرانە ئەبێت ئەنجام بدرێت.
سەوسەن بەهاری: بۆ ئەوەی کە منداڵان ئەم مافانە بەدەست بهێنن، بە بۆچونی ئێوە چی
کارێک ئەتوانرێت بکرێت وەیان ئەبێت بکرێت؟
مەنسوور حیکمەت: ئەمە
پرسیارێکی گرانە. لەبەر ئەوەی کە کارگەلێکی زۆر هەن کە ئەبێت بکرێن. ئاشکرایە کە
هەموو سیستمی کۆمەڵایەتی و ئابووری ئەمڕۆی جیهان کە بنەماکەی پارەپەرستی و
قازانجپەرستی کەمینەیەکی بچوکە، ڕیشەی هەموو بێمافیەکان و بەشمەینەتیەکانی خەڵکە وە
هەروەها منداڵانیش. ئەبێت ئەو سیستمە بگۆڕین و یەک دنیای باشتر لەجێگایدا دروست
بکەین. باشە، ئەوانەی کە سود لەم سیستەمە وەردەگرن، بە زمانیخۆش ڕێگەنادەن کە ئەم
کارە بکەین. ئەوان دەوڵەتیان هەیە، سوپایان هەیە، کلیسا و مزگەوت و زیندانیان هەیە،
تەلەفیزیۆنیان هەیە، کەشیشیان هەیە، مەلایان هەیە و ڕیگای ئازادی منداڵان دەگرن.
ئەبێ ئەوانە هەمویان بخەینە لاوەو شکستیان پێبهێنین. وە ئەمە خەباتێکە کە مرۆڤە چاک
و شەریفەکانی جیهان هەموو ڕۆژێک سەرقاڵن پێوەی. بەڵام بێبەشی منداڵان هۆکاری تریشی
هەیە، یەکێک لە گرنگترینی ئەوانە ناوشیاری ودواکەوتویی و دەمارگیری دایکان وباوکان
وخێزانەکان و گەورەساڵانێکە کە بۆنمونە بڕیارە خۆشەویست وپارێزەری منداڵانبن. لە
هەندێ شوێن تەنانەت کاتێک کۆمەڵگەو دەوڵەت هەندێک مافی منداڵان دانپێدائەنێن، هێشتا
دەمارگیری ئاینی و بیروباوەڕی باوی خودی خێزانەکان، منداڵەکان لە مافەکانیان بێبەش
دەکات. هەر بەو دەلیلە بۆ ئەوەی مافەکانی مناڵان بەدەست بهێنین ئەبێت خەباتیش بکەین
لە دژی ئەم دواکەوتویی و دەمارگیریانە.
سەوسەن بەهاری: هەندێک
لە گەورە ساڵان دژی بەشدار بونی منداڵان خۆیانن لە کەمپینەکانی خەبات بۆ
بەدەستهێنانی مافەکانی منداڵان، بەڵام بە هەمان شێوە هەر وەک ئەزانی (وە "داروگ "
وەک بەشێک لەوە ئەوەی نیشانداوە) ڕاستیە تاڵەکانی کاری مناڵان و هەزاران کێشەی تر،
بەکردەوە زۆرێک لەوانی کێشکردوەتە ناو ئەم خەباتە. بۆچوونی
ئێوە لەم بارەیەوە چییەو چ ڕێنوێنیەکتان هەیە؟
مەنسوور حیکمەت: منداڵان
کە خۆیان قوربانی ستەم و بێمافی و چەوساندنەوەن، وەک ملیۆنان منداڵ
کە بە کرێیەکی کەم و لە هەلومەرجێکی خراپدا کاردەکەن، یان کچانی خێزانە دەمارگیریە
ئیسلامیەکان کە ڕێگای ژیانێکی ئاساییان لێدەبەستن، بەدڵنیاییەوە ئەبێت ناڕەزایەتی
دەربڕن وە دەریشیئەبڕن. بەڵام بە بۆچونی من، ئەمە لەگەڵ ڕاکێشانی منداڵان لە
وڵاتانی وەک سوئید بۆ ناو کۆبونەوە سیاسیەکان ومانگرتن و خۆپیشاندانەکان زۆر
جیاوازی هەیە. من لەگەڵ ئەوەی دوهەم زۆر ناکۆکم. بە بڕوای من باوک ودایکان و
قوتابخانەکان وگەورەکان نابێت منداڵانی خوار تەمەنی یاسایی پەلکێشبکەن بۆ ناو
هەڵسوڕانی سیاسی وحیزبی وکۆڕوکۆبونەوەکانی خۆیان. ئەمە سەربەخۆ لە بۆچونی سیاسی
دایک وباوک، جۆرێکە لە مێشک شۆردنەوە. لەوانەیە بۆ هەندێک ئەوەی کە باوک و دایكێک
لە خۆپیشاندانەکاندا وێنەی مارکس ولینین یان نیڵسۆن ماندیلا و ئیقباڵ مەسیح
بدەنەدەست مناڵەکانیان، وەک کارێکی زۆر پێشکەوتنخوازانە بێتە پێشچاو. بەڵام ئەو
منداڵە هەر بەو ئەندازەیە
لەژێر کاریگەری دایکان وباوکان و گەورەکاندا و بێسەربەخۆیی ئەندێشە ئەو کارەی
کردوە، کە مناڵانیک لە لایەن سڤاستیکاوە (خاچە شکاوەکەی فاشیستەکانی) لکاندوە بە
باڵیانەوە و (لا
اله الا الله) لەناوچەوانیان
دەنوسن. وە باوەڕ بەوە دەکەی کە ئەم دوهەمەیان زۆر جێگای نیگەرانییە. من دژی
ڕاکێشانی منداڵانم بۆ ناو جوڵانەوە سیاسی و ئاینیەکان. بەرنامەی حیزبی ئێمە زۆر
بەڕۆشنی بردنی مناڵانی بۆ ئەو جۆرە کۆبونەوە و گربونەوە مەزهەبیانە ڕەتکردۆەتەوە.
بە بڕوای من ئەو دایک وباوکانەی کە ئەیانەوێت منداڵەکەیان ئازادیخواز وئازاد
وەباربهێنن، پێویستە ئامڕازی سەربەخۆیی بیرکردنەوەیان بدەنێ، پیویستە کەشێکی ئازادو
ئازادی بیرکردنەوەی بۆ فەراهەم بکەن. پێویستە بیروباوەڕە خورافی و باوەڕە
باوەکان(سونەتی) و گوشاری مێشکشۆردنی سیستەمی پەروەردەیی و ڕاگەیاندنەکان لە
قسەوباسەکانی خۆیدا لە کردەوەی ڕۆژانەی خۆیدا لە بەرچاوی ئەودا ڕەخنەی لێبگریت وە
لەهەمان کاتدا داوا لە ئەو بکەیت کە بیربکاتەوە، ببینێت، بپرسێت وە لە دۆزینەوەی
بۆچونی کۆتایی خۆی پەلەنەکات. مەسەلەیەکی تر بە بڕوای من ئەوەیە کە پیشاندانی هەموو
ڕەشیەکانی دنیا، تەواوی زوڵمەکان، تەواوی سەختیەکان و خراپەکان بە منداڵان کارێکی
دروست نیە. نابێت دنیایی گەشبین وپڕ ئومێدی منداڵان تێکبدەین. بە بڕوای من منداڵی
"زۆر سیاسی" بە گریمانەیەکی زۆر گەورەیەکی لا موبالاتی لێپەیدادەبێت. گۆشەیەکی
هەوڵی مرۆڤ بۆ گۆڕینی جیهان، هاتنی بەردەوامی نەوەیەکی نوێیە بۆ دونیایەک کە
نایەکسانی و دواکەوتویی بۆیان زۆر ڕاچڵەکێنەرە و جێگای پەسندیان نیە. چ
میهرەبانییەکی تێدایە کە ئێمە پێش منداڵەکان ڕەسمیەت بدەین بەم وێنە
ڕەشە.
سەوسەن بەهاری: ڕێکەوتنامەی
مافەکانی منداڵان، ١٨ ساڵی
وەک تەمەنی منداڵی دیاری کردوە و ئەنجامدانی کاری پیشەیی بۆ منداڵانی خوار ١٨ ساڵ
بە ڕیگە پێنەدراو داناوە، لە کاتێکدا لە بەرنامەی حیزبدا ئەم تەمەنە بە ١٦ ساڵ
دانراوە. هەڵبەت بەبۆچونی من ١٦ ساڵ بڕیاری بەشداری منداڵان لە ژیانی کۆمەڵایەتی،
هەڵبژاردن و ... ئاسان ئەکات ، بەڵام لە لایەکی ترەوە بە بۆچونی زۆریک لە پزیشکان و
شارەزایان، توانای جسمی بۆ کاری پیشەیی لە تەمەنی ١٨ ساڵیدا کامڵ ئەبێت، بۆچونی
ئێوە لەو بارەوە چییە؟
مەنسوور حیکمەت: بە
بۆچونی من تەمەنی یاسایی ١٦ساڵ بۆ دنیای ئەمڕۆ زۆر گونجاوترە. لاوێکی ١٦ ساڵەی
ئەمڕۆ، قەبارەیەکی زۆر گەورەتری لە زانست و زانیاری و هەواڵ بە بەراورد لەگەڵ
لاوێکی ١٨ ساڵەی دوو دەیە لەمەو پێشدا لە ئەندێشەی خۆیدا پاش و پێش دەکات. لە بواری
زانستیشدا چالاکتر ودەرگیرترە، خاوەن بۆچونی زیاترە. لە ڕوی ڕەوشت و ڕۆشنبیریەوە
سەربەخۆترە، ئاشکرایە کە ئەبێت کار و سەعاتکاری لاوێکی ١٦ساڵە، هەتا یەک لاوی ١٨
ساڵە، ئەبێت لەگەڵ تایبەتمەندیەکانی لەشولاریدا گونجاو بێت. بەڵام لە رۆژگاری
ئەمرۆدا خودی مۆڵەتدان بە چونە ناو کۆمەڵگە و جیهانی سیاسەت و چالاکی ئابوری لە ١٦
ساڵیدا گونجاوتر دێتەپێشجاو.
وەرگێڕانی:کاوە عومەر
پیداچونەوەی:هیوا ئەحمەد
____________________________
سەرچاوە:
بڵاوکراوەی "داروگ"، ژمارە ٥ ساڵی دووەم - نۆڤەمبەری ١٩٩٨.
.