چینی کرێکار، شۆڕش و ده‌سه‌ڵاتی سیاسی
1- ئێمه له سه‌رده‌می زنجره شۆڕشه‌کاندا ده‌ژین له سه‌ر ئاستی جیهان و ناوچه‌که و به‌تایبه‌تی له به‌هاری عه‌ره‌بیدا،که جه‌ماوه‌ری ملیۆنی توانیان گه‌وره‌ترین دکتاتۆره‌کان له ماوه‌یه‌کی کورتدا بڕوخێنن، چینی کرێکار بڕبڕه پشتی هه‌موو ئه‌م شۆڕشانه‌ی پێک ده‌هێنێ. هێشتا ئه‌م شۆڕشانه و به به‌‌هێزترین و قوڵترین سه‌رده‌مه‌کانیدا تێده‌په‌ڕێت و هێشتا ئاسۆی ئه‌م شۆڕشانه ناڕۆشنه و هێشتا چینی کرێکار نه‌یتوانیوه بگات به ئامانجه‌کانی له‌نزمترین ئاسته‌کانیدا، به‌ڵام هێزه دژی شۆڕشه‌کان توانیان هێزه‌کانی خۆیان کۆبکه‌نه‌وه و حکومه‌تی سه‌رده‌می شۆڕش پیک بهێنن که دژی چینی کرێکار و جه‌ماوه‌ری فراوانه، بۆ پاراستنی سیسته‌می ئابوری و سیاسی کۆن.
2- ته‌وه‌ره‌ی خه‌باتی شۆڕشگێرانه و شۆڕشه‌کان و ئامانجه سیاسیه‌کانی هه‌موو شۆڕشه‌کان گه‌یشتنه به ده‌سه‌ڵاتی سیاسی. ئامانجی شۆڕشه‌کانی ناوچه‌که برێتیه له وه‌لانانی حکومه‌ته دکتاتۆریه‌کان و حکومه‌ته‌کانی بانسه‌ری خه‌ڵک و هێنانه کایه‌ی ئه‌و حکومه‌تانه‌ی نمایه‌نده‌یی جه‌ماوه‌ر ده‌که‌ن و دابین کردنی ده‌سه‌ڵاتێک که نمایه‌نده‌ی سیاسیان بێت. کێشمه‌کێش له نێو ئه‌م شۆڕشانه‌‌دا به‌ڕۆشنی و شه‌فافی له نێوان دوو هێزی چینایه‌تی، چینی بۆرژوازی و چینی کرێکاردایه. بۆرژوازی به شێوه‌ی جیاجیا ڕێکخراوه له دام وده‌زگا حکومه‌تیه ڕوخاوه‌کان و دام وده‌زگا سیاسی و ئیداری و سه‌ربازیه‌کانی وه‌ک سوپاو هواڵگری و هێزه‌کانی ئاسایشی ناوخۆ و هه‌روه‌ها له حزبه سیاسیه دینی و قه‌ومی و لیبراڵیه کۆنه‌په‌رسته‌کاندا له شکڵ وشێوه‌ی جیا جیا و له پێکهاته‌ی جیاوزدا وبه پاڵپشتی ڕاسته‌وخۆی بۆرژوازی جیهانی له ڕووی ڕاگه‌یاندن وسیاسی و سه‌ربازیه‌وه، به‌ڵام چینی کرێکار ده‌ناڵێنی به ده‌ست ناڕێکخراوه‌یی حزبی و وجه‌ماوه‌ری ونه‌بونی به‌رنامه‌یه‌کی ڕؤشن و شه‌فاف و نه‌بونی ڕابه‌رانی سه‌رشناس و له‌سه‌ر ئاستی وڵاتدا، سه‌رنجامی سه‌رکوتی بۆرژوازی به‌درێژایی چه‌ند ده‌یه‌ی ڕابردوو. تا ئێستا تای ته‌رازوو له‌به‌رژه‌وه‌ندی بۆرژوازیدا ته‌واو بوه‌و چینی کرێکاریش به‌شی بوه‌ته قوربانی دان و خۆێن به‌خشین و ته‌نها ده‌ستی گه‌یشتوه به چه‌ند ده‌سکه‌وتێکی سه‌ره‌تایی.
3- سه‌رنجامی شۆڕشه‌کان و چاره‌سه‌ر نه‌کردنی هه‌ژاری و بێکاری و نه‌بونی خزمه‌تگوزاریه‌کان و خراپی باری گوزه‌رانی خه‌ڵک له ناوچه‌که و عێراق و به‌دی نه‌هاتنی ئامانجه‌کانی شۆڕشه‌کانی ناوچه‌که بۆ نان و ئازادی و که‌رامه‌تی ئینسانی، ده‌گه‌رێته‌وه بۆ کورتکردنه‌وه‌ی شۆڕش ته‌نها به‌ده‌وری ڕوخانی ڕژیمدا و ئاڵ گۆڕی سه‌رسه‌ره‌کی به‌سه‌ر ڕژێمه ئیستبدایه‌کاندا،ئه‌مه پێشانی دا پێویسته شۆڕش سیسته‌می کۆن بڕوخێنێ له ڕووی سه‌ربازی وسیاسی و ئیداریه‌وه و ڕژیمی سۆشیالستی دابمه‌زرێنێ، ئه‌مه‌ی دوای گرێی خوردوه به خه‌بات وهاتنه ناوه‌وه‌ی چینی کرێکارو هێزی سۆشیالستی ئه‌وه‌وه له چاره‌نوسی سیاسی کۆمه‌ڵگه‌دا و دامه‌زراندانی جیهانێکی ئازاد ویه‌کسان.
4- ڕۆڵی چینی کرێکار له به‌رهه‌مهێنان و جێگاو ڕێگای له ئابوریدا ئه‌و جێگا چاره‌نوس ساز وحه‌ساسه‌ی پێ به‌خشیوه له کێشمه‌کێش له سه‌ر ده‌سه‌ڵاتی سیاسی و یه‌کڵایکردنه‌وه‌یدا، چینێک که زمانه‌ی خوێنبه‌ری سه‌ره‌کی بورژوازی له‌ژێردستدایه و هه‌موو سه‌روه‌ت سامانی وڵات به‌رهه‌م دێنێ، به مانگرتن یان مانگرتی گشتی تونای بورژوازی فه‌له‌ج ده‌کات و هه‌موو جوڵه‌و چالاکیه‌کانی لێده‌سێنێته‌وه. مێژوو سه‌لماندوه‌یه‌تی هه‌ر کاتێ چینی کرێکار واردی مه‌یدان بووبێ ڕوخانی ده‌سه‌ڵات به شێوه‌کی خێرا نزیک بوه‌ته‌وه، به ڕاگه‌یاندنی مانگرتنی کرێکارانی میسر حسنی موبارک ڕووخا، خه‌باتی کرێکاران له چله‌کان وپه‌نجاکانی سه‌ده‌ی ڕابردودا شایده له ده‌رپه‌ڕاندنی داگیکه‌ران له عێراق، ومانگرتنی کرێکارانی گاورباخی ده‌رکه‌وتوو ترین نمونه‌کانێتی. له شۆڕشی به‌ڵشه‌فیشدا شورای کرێکارانی بطرسبورگ پشکی سه‌ره‌کی به‌رکه‌وتبووله شۆڕشی و له ڕوخانی حکومه‌تی کرنیسکی وله سه‌رخستنی شۆڕشی سۆشیالستیدا.
5- له عێراق دا کرێکاران و جه‌ماوه‌ر شان به‌شانی جه‌ماوه‌ری ناوچه‌که به درێژایی ساڵی ڕابردو خه‌باتیان کردوه و تا ئێستا پلمیک و کێشمه‌کێش به‌رداوامه و بۆرژوازی ترساوه و موته‌ره‌دیده حاڵه‌تی سه‌رلێشێوای به‌سه‌رده‌بات، کێشمه‌کێش له نێوان هێزه سه‌ره‌کیه‌کاندا، ناسێونالیزمی عه‌ره‌بی و ئیسلامی سیاسی وناسێونالیزمی کورد گه‌یشتوه‌ته ئاستی شکاندنی ئێسک وپروسکی یه‌کتر و ئابڕوی سیاسی و سومبوڵه‌کانی یه‌کتریان به ڕۆژی ڕوناک بردوه،حکومه‌ته له‌رزۆکه‌که‌یان ئه‌ناڵێنی به‌ده‌ست قوڵترین قه‌یه‌رانی سیاسیه‌وه و به‌تایبه‌ت دوای کشانه‌وه‌ی هێزه‌کانی ئه‌مه‌ریکا له عێراق. هاتنه ناوه‌وی چینی کرێکار به ڕیزی سه‌ربه‌خۆی خۆیه‌وه و حزبی سیاسی خۆیه‌وه خاڵێکی وه‌رچه‌رخانی گرنگ پێک ده‌هێنی له گه‌شه‌کردنی ئه‌وزاعی شۆڕشگێڕانه و پاکردنه‌وه‌ی هه‌موو هێزه سیاسیه کۆنه‌په‌رسته‌کان له سه‌ر گۆڕه‌پانی سیاسی.
بۆ ده‌رچوون له‌م بارودۆخه‌و بۆ شکاندنه‌وه‌ی ته‌رازووی هێز له به‌رژه‌وه‌ندی چێنی کرێکاردا، حزب ئه‌م ئه‌رکانه ده‌خاته ده‌ستوری کاریه‌وه؛
أ- به‌هێز کردنی حزبی کۆمۆنیستی کرێکاری چه‌پی عێراق، گۆڕینی بۆ ئامرازێکی خه‌باتکارانه به ده‌ست چینی کرێکاره‌وه و به‌تایبه‌ت به‌ده‌ست ڕابه‌رانیه‌وه و تێگه‌ییاندنیان تێگه‌یشتنێکی قوڵ سه‌باره‌ت به حزب و جیگاو ڕێگای له خه‌باتی چینایه‌تی و به‌رزکردنه‌وه‌ی ڕێگا چاره‌ی سۆشیالستی له ڕێگای حزب وڕابه‌رنی سۆشیالستی چینی کرێکاره‌وه به‌ڕووی هه‌موو ڕێگا چاره‌کانی بۆرژوازیدا.
ب- ده‌رخستی ڕابه‌رانی کرێکاران وه‌ک ڕابه‌رانی کۆمه‌ڵگه نه‌ک ته‌نها وه‌ک ڕابه‌رای توێژێکی دیاری کراو، دروست کردنی تۆڕی ڕابه‌رانی چینی کرێکارو ڕابه‌رانی خه‌باته جه‌ماوه‌ریه‌کان و ڕێکخستنی خه‌باتێکی هه‌مه‌گیر.
ت- خه‌بات له پێناو ڕێکخراوه جه‌ماوه‌ریه کرێکاریه‌کاندا و له‌سه‌ر بنه‌مایه‌کی فراوان و به‌هێز کردنی سونه‌تی شورایی له ڕیزه‌کانی کرێکاراندا له ڕێگای به‌هێز کردنی کۆبونه‌وه‌ی گشتی له نێو ڕیزه‌کانی کرێکاراندا، فۆکه‌س کردنه سه‌ربه‌هێزکردنی کۆبونه‌وه‌ی گشتی وه‌ک یه‌ک سونه‌تی شورایی وڕێگایه‌ک بۆ هاتنه ناوه‌وه‌ی چینی کرێکار له ده‌خاله‌تی شۆڕشگێرانه له چاره‌نوسی خۆیان به‌شکڵێکی ڕاسته‌وخۆ. ڕێکخسنی چینی کرێکار له‌سه‌ر ئاستی حزبی و جه‌ماوه‌ی هاوته‌ریبی یه‌ک.
ث- خه‌بات له پێناو شکاندنی هه‌ڵمه‌ته‌کانی حکومه‌تی عێراق له دژی چینی کرێکار، هه‌ڵوه‌شانه‌وه‌ی سیاسه‌ته دژی کرێکاریه‌کانیان و به‌تایبه‌ت 1- هه‌ڵوه‌شانه‌وه‌ی بڕیاری 150 که به پێێ ئه‌و قه‌راره کرێکاران کرانه فه‌رمانبه‌ر و مافی مانگرتن و خۆڕێکخستنیان لێ زه‌وت کرا. 2- هه‌ڵوه‌شانه‌وه‌ی ئه‌و یاسا کاره‌ی که له په‌رله‌مانی عێراقی خراوه‌ته ڕوو خستنه‌ڕووی یاسا کارێک که نیازه‌کانی چینی کرێکار وه‌ڵام بداته‌وه.3- خه‌بات له‌پێناو داسه‌پاندانی مافی ڕێکخراوبوون و مانگرتندا. تا چینی کرێکار بتوانێت باردۆخه‌که له‌به‌رژه‌وه‌ندی خۆی بشکێنێته‌وه، بۆ سه‌رخستنی شۆڕشه‌که‌ی له دژی بۆرژوازی.
ج- ڕابه‌رایه‌تیکردنی خه‌باته جه‌ماوه‌ریه‌کان و بزووتنه‌وه جه‌ماوه‌ریه‌یه‌کانی تر ووه‌ک بزوتنه‌وه‌ی ژنانی شۆڕشگێڕ و خه‌باتی لاوان و خه‌بات له پێناو سکۆلاریزمدا و خه‌بات له دژی ئیعدام و له پێناو ئازادیه سیاسی وفه‌ردیه‌کاندا ، ڕبه‌رایه‌تی کردنیان له‌لایه‌ن ڕابه‌ره کرێکاریه سۆشیالستیه‌کان و، ڕێکخستی ئه‌م خه‌باته‌نه وه‌ک یه‌ک خه‌باتی سیاسی عموم خه‌ڵکی له ڕێگای ته‌ئمینی ڕابه‌رایه‌تیه‌کی حزبی سۆشیالستی ووشیاره‌وه.
گۆڕینی باردۆخه‌که و هاتنه ناوه‌وه‌ی چینی کرێکاری عێراق له ئێستا دا له هه‌موو کاتێکی تر ئیمکانی زیاترهه‌یه و به‌تایبه‌تی له‌م باردۆخه شۆڕشگێرانه‌یه و هه‌ڵبه‌ز و دابه‌زه سیاسیانه‌دا و قه‌یه‌رانی قوڵی بۆرژوازی و هێزه سیاسیه‌کان له عێراقدا، هه‌روه‌ها ئه‌و قه‌یه‌رانه‌ی که ئیسلامی سیاسی به هه‌موو ڕه‌وه‌نده‌کانیانه‌وه و شکسته‌کانیان و داکشانه‌کانیان له سوریا و له میسر و له‌سایه‌ی بوونی حزبی سیاسی خۆی وحزبی کۆمۆنیستی کرێکاری چه‌پی عێراق به سیاسه‌ت وبه‌رنامه‌و بڕیاره شۆڕشگێره سۆشیالستیه‌کانیه‌وه. رزگاری کۆمه‌ڵگه وابه‌سته‌یه به‌م ئاڵ گۆڕانه و هاتنه ناوه‌وه‌ی چینی کرایکار به حزبی سیاسیه‌وه له مه‌یدانی سیاسی و خه‌بات له پێناو ده‌سه‌ڵاتی سیاسی و کۆتای هێنان به بارودۆخی کاره‌سات باری کۆمه‌ڵگه‌دا.
کۆنگره هه‌موو ڕابه‌رانی سۆشیالست به‌تایبه‌تی ڕابه‌رانی کرێکاری به‌نگه‌واز ده‌کات بۆ په‌یوه‌ست بوون به ڕیزه‌کانیه‌وه و بۆ به‌هێز کردنی ڕیزه‌کانی و ده‌رخستنی ڕابه‌رانی کرێکاری سۆشیالست وه‌ک ڕابه‌رانی کۆمه‌ڵگه و حزب بۆ ڕابه‌ری کردنی کۆمه‌ڵگه بۆ ڕزگاری و ده‌مه‌زراندنی کۆمه‌ڵگه‌یه‌کی بێ چین و کۆمه‌ڵگه‌یه‌کی ئینسانی که تێدا ئنسان له‌لایه‌ن ئینسانه‌وه چیتر ناچه‌وسێته‌وه.
په‌سه‌ند کراوی کۆنگره‌ی سێیه‌می حزبی کۆمۆنیستی که‌ێکاری چه‌پی عێراق
22-12-2012